SATURDAY, 21 FEBRUARY, 2015
ಹೊಸಪೇಟೆ: ಜೀವನದಲ್ಲಿ ಏನಾದರೂ ಸಾಧಿಸಬೇಕು ಎನ್ನುವವರಿಗೆ ನೂರೆಂಟು ದಾರಿ. ಹೀಗೆ ಗ್ರಾಮೀಣ ಮಕ್ಕಳ ಕ್ರೀಡೆಗಳನ್ನು ಉಳಿಸುವ ನಿಟ್ಟಿನಲ್ಲಿ ಹೊಸಪೇಟೆ ಸ್ಥಳೀಯ ಪ್ರತಿಭೆಗಳು ನಿರ್ಮಿಸಿದ 15 ನಿಮಿಷದ ‘ಆಟ ಬೊಂಬಾಟ’ ಕಿರುಚಿತ್ರ ತೆರೆ ಕಾಣಲು ಸಿದ್ಧವಾಗಿದೆ. ಸ್ಥಳೀಯ ಯುವ ಪ್ರತಿಭೆಗಳೇ ನಿರ್ಮಿಸಿರುವ ಈ ಕಿರುಚಿತ್ರ ಇಷ್ಟರಲ್ಲಿಯೇ ‘ಯು ಟ್ಯೂಬ್‌’ನಲ್ಲಿ ಹರಿದಾಡಲಿದೆ.
ನಗರದ ಪ್ರೌಢದೇವರಾಯ ಎಂಜಿನಿಯರಿಂಗ್ ಕಾಲೇಜಿನ ಹಳೆ ವಿದ್ಯಾರ್ಥಿಗಳಾದ ಅನಿಲ್‌ಕುಮಾರ ಮತ್ತು ಕರಣ್‌ ಕಿರುಚಿತ್ರವನ್ನು ನಿರ್ದೇಶಿಸಿದ್ದು, ಮೇಧಾ ಆರ್ಟ್ಸ್‌ ಈ ಕಿರುಚಿತ್ರವನ್ನು ನಿರ್ಮಿಸಿದೆ. ಅಲ್ಲದೆ ಇದಕ್ಕಾಗಿ ಸ್ಥಳೀಯ ಸಂಪನ್ಮೂಲಗಳನ್ನೇ ಬಳಸಿಕೊಂಡಿರುವು ಒಂದು ವಿಶೇಷ.
ಆಧುನಿಕತೆಯ ಭರದಲ್ಲಿ ಗ್ರಾಮೀಣ ಕ್ರೀಡೆಗಳನ್ನು ಮರೆಯುತ್ತಿರುವ ಇಂದಿನ ಮಕ್ಕಳು ಕಂಪ್ಯೂಟರ್ ಹಾಗೂ ಮೊಬೈಲ್‌ ಗೇಮ್ ಸೇರಿದಂತೆ ದೈಹಿಕ ಚಟುವಟಿಕೆಗಳಿಗೆ ಅವಕಾಶವೇ ಇಲ್ಲದಿರುವ ಆಟಗಳಲ್ಲಿ ತೊಡಗಿಕೊಂಡಿದ್ದಾರೆ. ಇದರಿಂದ ದೇಶೀ ಕ್ರೀಡೆಗಳಿಗೆ ಅವಕಾಶವಿರಲಿ ಪರಿಚಯವೇ ಇಲ್ಲದಂತಾಗಿದ್ದು, ಗ್ರಾಮೀಣ ಕ್ರೀಡೆಗಳನ್ನು ಪರಿಚಯಿಸುವ ಒಂದು ಸಣ್ಣ ಪ್ರಯತ್ನ ಈ ಕಿರುಚಿತ್ರದಲ್ಲಿ ಮೂಡಿ ಬಂದಿದೆ.
ಕಿರುಚಿತ್ರದಲ್ಲಿ ಲಗೋರಿ, ಚಿನ್ನಿ–ದಾಂಡು, ಗೋಲಿ, ಬುಗರಿ, ಮುಟ್ಟಾಟ, ಸರಬಡಿಗೆ ಆಟ ಸೇರಿ ಒಟ್ಟು ಗ್ರಾಮೀಣ ಮಕ್ಕಳ ಕ್ರೀಡೆಗಳ ಪರಿಚಯ ಹಾಗೂ ಆಡುವ ಬಗೆ ತಿಳಿಸಿಕೊಡಲಾಗಿದೆ.
ಶಾಲೆಯಿಂದ ಬಂದ ಹುಡುಗನೊಬ್ಬ ಪುಸ್ತಕದ ಬ್ಯಾಗ್‌ ಎಸೆದು ಲ್ಯಾಪ್‌ ಟಾಪ್‌ ಹಿಡಿದು ಕಂಪ್ಯೂಟರ್ ಗೇಮ್ ಆಡುತ್ತಾ ಕುಳಿತುಕೊಳ್ಳುತ್ತಾನೆ. ಆಗ ತಂದೆ ಮಗನನ್ನು ಗದರಿಸಿ ಲ್ಯಾಪ್‌ಟಾಪ್‌ ಕಸಿದು ಕಪಾಟಿನಲ್ಲಿ ಇಡುತ್ತಾರೆ. ಹುಡುಗ ಮತ್ತೆ ಲ್ಯಾಪ್‌ಟಾಪ್‌ ತೆಗೆದುಕೊಳ್ಳಲು ಹೋದ ಸಂದರ್ಭ ಆತನಿಗೆ ತಂದೆ ಚಿಕ್ಕವಯಸ್ಸಿನಲ್ಲಿ ಆಟ ಆಡುತ್ತಿದ್ದ ಫೋಟೊಗಳ ಒಂದು ಆಲ್ಬಂ ಸಿಗುತ್ತದೆ.
ಆ ಆಲ್ಬಂನಲ್ಲಿರುವ ಆಟದ ಫೋಟೊಗಳ ಬಗ್ಗೆ ಕುತೂಹಲದಿಂದ ಆತನ ತಂದೆಯ ಬಳಿಗೆ ಬರುತ್ತಾನೆ. ಆಗ ತಂದೆ ತಾನು ಚಿಕ್ಕವನಿದ್ದಾಗ ಆಡುತ್ತಿದ್ದ ಆಟಗಳ ಕುರಿತು ವಿವರಿಸುತ್ತಾ ಹೋಗುತ್ತಾರೆ. ಆಗ ಆ ಚಿತ್ರಗಳನ್ನು ನೋಡುತ್ತಲೇ ಆ ಹುಡುಗನ ಅಭಿರುಚಿ ಬದಲಾಗುತ್ತಾ ಹೋಗುತ್ತದೆ. ಇದು ಈ ಕಿರು ಚಿತ್ರದ ಸಾರಾಂಶ.
‘ದೇಶೀ ಕ್ರೀಡೆಗಳನ್ನು ಮರೆಯುತ್ತಿರುವ ಇಂದಿನ ಮಕ್ಕಳು ಕೇವಲ ಕಂಪ್ಯೂಟರ್ ಆಟಗಳಲ್ಲಿ ಮಾತ್ರ ಆಸಕ್ತಿ ತೋರುತ್ತಿದ್ದಾರೆ. ಸೃಜನಾತ್ಮಕತೆಯಿಂದ ಕೂಡಿದ ಗ್ರಾಮೀಣ ಮಕ್ಕಳು ಕ್ರೀಡೆಗಳನ್ನು ಮರೆಯುತ್ತಿದ್ದು, ಮುಂದೊಂದು ದಿನ ಇಂಥ ಆಟ ಇತ್ತು ಎಂದು ಹೇಳುವುದೂ ಕಷ್ಟವಾಗುವ ಆತಂಕ ಎದುರಾಗಿದೆ. ದೇಶೀ ಕ್ರೀಡೆಗಳನ್ನು ಉಳಿಸುವ ನಿಟ್ಟಿನಲ್ಲಿ ಅವುಗಳನ್ನು ಪರಿಚಯಿಸುವ ಒಂದು ಸಣ್ಣ ಪ್ರಯತ್ನವನ್ನು ಈ ಕಿರುಚಿತ್ರದ ಮೂಲಕ ಮಾಡಲಾಗಿದೆ’ ಎನ್ನುತ್ತಾರೆ ಅನಿಲ್‌ಕುಮಾರ್‌.
ಕಂಪ್ಯೂಟರ್ ಆಟಗಳಿಂದ ದೇಶೀ ಕ್ರೀಡೆಯತ್ತ ಮಕ್ಕಳನ್ನು ಸೆಳೆಯುವಲ್ಲಿ ಹಾಗೂ ಅಳಿಸಿ ಹೋಗುತ್ತಿರುವ ಕ್ರೀಡೆಗಳನ್ನು ಮುಂದಿನ ಪೀಳಿಗೆಗೆ ಕೊಂಡೊಯ್ಯುವಲ್ಲಿ ಕಿರುಚಿತ್ರ ಒಂದು ದಿಟ್ಟ ಹೆಜ್ಜೆಯಾಗಿದ್ದು, ಜನಪ್ರಿಯವಾಗುವ ವಿಶ್ವಾಸ ಚಿತ್ರತಂಡದಲ್ಲಿ ಮನೆ ಮಾಡಿದೆ.
ಹೊಸಪೇಟೆಯ ಸುತ್ತಮುತ್ತಲಿನ ಪ್ರದೇಶವನ್ನೆ ಚಿತ್ರೀಕರಣಕ್ಕೆ ಆಯ್ದುಕೊಳ್ಳಲಾಗಿದ್ದು, ಹೊಸಪೇಟೆಯ ಆ್ಯರೋಣ್‌ ಎಚ್. ಅವರ ಸಂಗೀತ ಕಿರುಚಿತ್ರಕ್ಕೆ ಜೀವ ತುಂಬಿದೆ. ಸ್ಥಳೀಯ ದೀಪಾಯನ ಶಾಲೆಯ ಏಳನೇ ತರಗತಿಯ ವಿದ್ಯಾರ್ಥಿಗಳ ಅಭಿನಯ ಚಿತ್ರಕ್ಕೆ ಶಕ್ತಿ ತುಂಬಿದೆ. ತಂದೆ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಅದೇ ಶಾಲೆಯ ದೈಹಿಕ ಶಿಕ್ಷಕ ಜಂಬುಕೇಶ್ವರ ಅಭಿನಯಿಸಿದ್ದಾರೆ.
ಹೊಸಪೇಟೆಯ ಸುತ್ತಮುತ್ತಲಿನ ಪ್ರದೇಶವನ್ನೆ ಚಿತ್ರೀಕರಣಕ್ಕೆ ಆಯ್ದುಕೊಳ್ಳಲಾಗಿದ್ದು, ಹೊಸಪೇಟೆಯ ಆ್ಯರೋಣ್‌ ಎಚ್. ಅವರ ಸಂಗೀತ ಕಿರುಚಿತ್ರಕ್ಕೆ ಜೀವ ತುಂಬಿದೆ. ಸ್ಥಳೀಯ ದೀಪಾಯನ ಶಾಲೆಯ ಏಳನೇ ತರಗತಿಯ ವಿದ್ಯಾರ್ಥಿಗಳ ಅಭಿನಯ ಚಿತ್ರಕ್ಕೆ ಶಕ್ತಿ ತುಂಬಿದೆ. ತಂದೆ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಅದೇ ಶಾಲೆಯ ದೈಹಿಕ ಶಿಕ್ಷಕ ಜಂಬುಕೇಶ್ವರ ಅಭಿನಯಿಸಿದ್ದಾರೆ.
ಕಥೆ, ಚಿತ್ರಕಥೆ, ಕ್ಯಾಮೆರಾ ಹಾಗೂ ನಿರ್ದೇಶನ ಎಲ್ಲವನ್ನೂ ಅನಿಲ್‌ಕುಮಾರ್‌ ಮತ್ತು ಕರಣ್‌ ನಿರ್ವಹಿಸಿದ್ದು, ಪ್ರಭಾಕರ್‌.ಎಸ್.ಎಂ. ಸಹಾಯಕ ನಿರ್ದೇಶಕರಾಗಿ ಕಾರ್ಯ ನಿರ್ವಹಿಸಿದ್ದಾರೆ. ಮಲ್ಲಿಕಾರ್ಜುನ ಅವರ ಸಂಭಾಷಣೆ ಕಿರುಚಿತ್ರಕ್ಕೆ ತಕ್ಕುದಾಗಿದೆ.
‘ದೇಸೀಯತೆ ಸಾರುವ ಉದ್ದೇಶದಿಂದ ಕಿರುಚಿತ್ರ ನಿರ್ಮಿಸಲಾಗಿದೆ. ಯಾವುದೇ ವಾಣಿಜ್ಯದ ಉದ್ದೇಶದ ಇಲ್ಲ. ಮಕ್ಕಳ ಸೃಜನಶೀಲತೆ ಹೆಚ್ಚಿಸುವ ಉದ್ದೇಶದಿಂದ ಮಕ್ಕಳೇ ಅಭಿನಯಿಸಿರುವ ಈ ಚಿತ್ರವನ್ನು ರಾಜ್ಯದ ಎಲ್ಲ ಪ್ರಾಥಮಿಕ, ಪ್ರೌಢಶಾಲೆಗಳಲ್ಲಿ ಪ್ರದರ್ಶನಕ್ಕೆ ಅವಕಾಶ ನೀಡಬೇಕು’ ಇನ್ನೊಬ್ಬ ನಿರ್ದೇಶಕ ಕರಣ್‌ ಮನವಿ ಮಾಡುತ್ತಾರೆ.